Parece que foi onte cando pola bancada de Preferencia dous mozos cubertos coas suas bandeiras de Vigo e do Celta, repartían panfletos para unirse á peña Carolo. Aquela peña fracasou fai seis anos, non chegando a constituirse, pero a loita e o convencimento propio fixeron que un ano despois xurdira Centolos Celestes co impulso dun grupo reducido, pero convencido de Celtistas, que grazas ó seu esforzo levaron á peña o que agora mesmo é.
O 28 de marzo de 2007 fundábase en Vigo a peña celtista Centolos Celestes despois de dous anos de duro traballo, con poucos recursos, pero con moita ilusión. Cun claro compromiso viguista e unha identidade fortemente galeguista, dende Centolos Celestes quixemos sempre aportar un aire novo o mundo peñista do Real Clube Celta de Vigo.
Por unha banda apostamos pola seriedade na faceta administrativa, tanto interna como coa Federación de Peñas e o Real Clube Celta de Vigo, mantendo unhas boas relacións con ambos dende o 2007, e tentando solucionar as diferencias e os problemas dende o diálogo e a responsabilidade.
As relacións co resto de peñas sigue sendo inmellorable dende o comezo, polo que dende Centolos Celestes só podemos agradecer a todas e cada unha das peñas, agrupacións, colectivos e xentes en xeral cos que nos atopamos no camiño, toda a axuda e cariño que vimos recibindo dende fai cinco anos.
Se falábamos antes de seriedade, de responsabilidade, compre salientar que o campo de actuación dunha peña está no estadio, no vello Balaídos, e é ahí onde tentamos deixar os nosos folgos tódalas xornadas para animar ó noso equipo. Marcador, a bancada máis animada, é o noso particular balcón, onde levamos catro dos nosos cinco anos de existencia.
Se facemos un percorrido pola breve historia de Centolos Celestes, dentro do noso primeiro ano de existencia, quixemos proxectar a peña, dala a coñecer a través do noso compromiso celtista. Fixemos viaxes, dende Melgaço ata Huelva, creamos o escudo, a primeira pancarta, os primeiros socios. En definitiva, desenrrolamos o concepto 'Centolos Celestes', baseado nun celtismo integrador e innovador. Deste primeiro ano destaca todo o relacionado co movemento 'Campo Novo Xa!', ideado dende a nosa peña e desenrrolado e apoiado pola meirande parte das peñas do Celta e polo celtismo en xeral. Compromiso da peña orientado a dignificar o recinto vigués, vetusto estadio dun histórico da liga española.
O segundo ano, foi o ano de 'Centolos Music' unha plataforma que poderíamos considerala de intercambio e promoción da música feita na área metropolitana de Vigo, chegando a toda Galicia e Portugal. Grupos como Drumdrama, Pániko en las Calles, Rever, Aid ou Phantom Club pasaron por Cmusic e deixaron a sua pegada con entrevistas e adicatorias. Centolos Music supuxo un paso orixinal e transversal da peña, que tamén lle axudou a autopromocionarse e medrar.
A medida que se ían implementando actividades, proxectos, o número de socios foi incrementando, e pouco a pouco, fóronse estreitando relacións entre nós, e tamén cos demáis celtistas que nos rodeaban. O terceiro ano, foi un ano de trocos internos e afianzamento. Nese ano desenrolouse o concepto 'xornada celeste' en compaña de Comando Celta, nun ano moi duro dende o punto de vista deportivo. A 'xornada celeste' non consistía noutra cousa que entender o partido de Celta como un 'día Celta', facento xuntanzas e actividades relacionadas, dende a mañá ata a noite, fomentando a unidade entre os poucos que nos xuntabamos no vello Balaidos.
A tempada 2010-2011, coincidente co noso cuarto ano, foi a do crecemento total de Centolos Celestes, acadando os 85 socios, algo impensable en tempadas pasadas. Moitos destes socios estaban ainda repartidos entre as distintas bancadas, e foi obxetivo común o xuntarmos todos en Marcador co paso do tempo. Nesa tempada, fixemos actividades conxuntas con celtistas e outras peñas. Viaxes, comidas, ceas, xuntanzas os luns, actividades no nadal, creación de saias celtas, manufactura de bufandas tradicionais, os descensos de Fragoso, e un longo etcétera.
Esta tempada chegamos ó quinto aniversario cun grupo de máis de cen membros, máis xuntos na bancada, máis fortes que nunca e coas mellores esperanzas posibles, nun ano que seguro será o do ascenso. O traballo comercial de expansión da peña, coas novas bufandas oficiais, co éxito das saias centolas e a presencia totalmente activa nas redes sociais, veñen de levar á peña ó máis alto dende a sua fundación.
A pesares disto, a nosa vontade é seguir medrando en tódolas direccións, continuar o camiño que xuntos decidimos emprender hai xa un lustro, loitar por seren mellores e por facer máis polo noso equipo, polo noso Celta, a única razón da nosa existencia.
A paixón creativa dos membros da peña, a liberdade, a enerxía, a orixinalidade e o respecto, fan que cada día sexan máis os Centolos e Centolas que acuden xuntos a Balaídos. Ser celtistas é unha das meirandes sortes que temos, así medramos e así morreremos.
Grazas a todos e todas por facelo posible.
SEMPRE CELTA!
Texto enviado pola Peña Celtista Centolos Celestes. Parabéns!
.JPG)
