O Celta B non comezou con bo pé o seu compromiso ligueiro ante o Villalonga FC. Os vigueses realizaron unha primeira parte discreta na que apenas roldaron a área rival, sendo os locais quen protagonizaron as contadas ocasións de perigo.
O Villalonga lograba estrear o marcador no minuto 27, aproveitando un desaxuste defensivo do Celta B. Machu recibiu o balón escorado na área e, tras desfacerse da marcaxe de Antón, cedeu o balón ao momento de penalti para que Nelo anotase a pracer.
O filial céltico tivo síntomas de recuperación tras o 1-0, mellorando as sensacións co paso dos minutos, pero o segundo gol do Villalonga ao fío do descanso abateu aos de Pichi Lucas. O lateral Leo centrou desde banda dereita a Machu, que rematou a porta forzado pero coa suficiente precisión como para bater a Rubén.
O tempo morto chegou coas cousas moi costa arriba para o Celta B, pero os celestes sorprenderon cunha segunda parte na que pareceron outro equipo. Os célticos foron superiores nos últimos 45 minutos, logrando traducir o seu dominio en goles.
No minuto 54 Jonny iniciaba a recuperación céltica. Tras un lío na área do Villalonga e un disparo de Borja, o lateral destro cazou o rexeite de primeiras e bateu por abaixo a Roberto, porteiro do equipo local.
Os olívicos gozaban dos seus mellores minutos de xogo en todo o partido. No 67 unha boa combinación entre Thaylor e Añón terminou cun remate de Félix na área pequena. Clarísima ocasión na que Roberto realizou un auténtico paradón para evitar o gol do empate.
A xogada continuou coa recuperación do esférico por parte dos celestes e un centro desde banda esquerda. O despexe defectuoso da defensa do Villalonga rematouno de primeiras Levy Madinda, que igualou con contundencia o resultado no marcador.
Co 2-2 no marcador o encontro volveuse trepidante. Ambos os equipos dispuxeron de ocasións para levar o partido, aínda que eran os vigueses os máis incisivos en ataque. Thaylor e Marcos Torres estiveron moi preto de anotar, pero a boa actuación do porteiro Roberto impediu que o Celta B lograse o 2-3.
O partido finalizou con algo de polémica. No 91 o colexiado anulou un tanto ao Villalonga por fóra de xogo e, segundos despois, detivo unha contra do Celta B con moito perigo, tamén por unha dubidosa posición anti-regulamentaria.
Ficha técnica
Vilalonga: Roberto Pazos, Leo, Miguel, Feáns, Isma, Joan Marc, Marcos Saúl, Nelo (Nogueira, min.66), Tenorio, Roberto Piñeiro (Fran Matos, min.70) e Machu
Celta B: Rubén, Juanma Torres, Antón, Maestre, Jonny, Borja (Marcos Torres, min.65), Madinda, Añón (Sergio Santos, min.83), Félix, Rubén Martínez e Camochu (Thaylor, min.65)
Goles: Nelo, 1-0 (min.27); Machu, 2-0 (min.43); Jonny, 2-1 (min.54); Madinda, 2-2 (min.68)
Árbitro: Rodríguez Campos. Amonestou a Rubén Martínez, Félix e Juanma Torres
Campo: San Pedro
Crónica: Web Oficial Real Club Celta
0 comments:
Publicar un comentario