A peña celtista Heredeirxs do Celta emitiu este sábado un comunicado no que amosa o seu malestar polo desenvolvemento do evento celebrado o pasado xoves polo Real Club Celta, no que se presentou a segunda fase do proxecto Galicia Sports 360 e se anunciou o cambio de nome a Celta360.
Desde a peña consideran que o compoñente político cobrou un protagonismo inxustificado, en detrimento do foco deportivo que debía primar. "Pedimos ao Celta que garanta a neutralidade política en futuros eventos e se dea prioridade sempre ao interese deportivo", sinalan na súa declaración.
Así mesmo, expresan o seu rexeitamento ao que cualifican como un uso político do acto, que ao seu xuízo debía centrarse nos avances e beneficios deportivos, sociais e culturais do proxecto. "O acto foi convocado co ánimo de proxectar os avances e beneficios deportivos, sociais e culturais do proxecto, que se espera que sexa un fito para o club e a comunidade", explican.
A peña móstrase especialmente crítica coa intervención da alcaldesa de Mos, Nidia Arévalo, a quen acusan de desviar o enfoque do evento cara a contidos de "clara natureza política". "Non era o lugar nin o momento", subliñan.
Finalmente, lamentan que este tipo de intervencións provoquen que "o foco se desvíe e o importante pase a un segundo plano", en referencia ao impacto que actos desta índole poden ter sobre a percepción do proxecto e do propio club.
0 comments:
Publicar un comentario