Este venres dende as 20:00 será a presentación oficial do Celta

Balaídos celebra este venres unha das citas máis significativas do ano para todo o celtismo, o Memorial Quinocho, un trofeo no que se rememora a figura do inesquecible ex xogador e xerente do RC Celta. A xornada comezará coa tradicional ofrenda floral no cemiterio de Pereiró, á que cada ano acode a familia de Quinocho e unha representación do club vigués.

Xa pola tarde, a partir das 20:00h, terá lugar no Estadio de Balaídos a presentación dos distintos conxuntos célticos, desde os benjamines até o primeiro equipo. O club anima aos afeccionados a que acudan con tempo para arroupar aos canteiráns e xogadores celestes.

Ás 20:30h, despois dun minuto de silencio en memoria do piloto moañés Dani Rivas, falecido recentemente nun tráxico accidente, dará comezo o choque ante o Genoa CFC, un histórico do fútbol italiano. Os despachos de billetes de Balaídos despacharán entradas para o encontro desde as 09:00 ata a hora de comezo do partido de maneira ininterrompida. Ademais, os celtistas que aínda non tramitasen o seu abono para a nova tempada están a tempo de facelo nestas mesmas dependencias con idéntico horario.

Nota de prensa